Exodus 21

A Vinara ni Matakari a Vorakato

(Vinara 15:12-18)

1A Vure i takia e Moses, “O vaka­longo e huriki a Israel vona a vinara nga. 2 ^aNa tahuna o kona a vorakato na Hibru, ge leho kunana vomu na pida ge polotara. Na poloruana pida o rudua ge hamule na tanga vona, pali nahea ge kona ioe muri ge vano. 3A vorakato i uka ma i parangi na tahuna o bolea vona, ia kunana ge vano. Pali ia ge tahoka e girihina muga na tahuna o kona ia vona, ge bolea e girihina ge vano turana. 4Na tahuna a matakari vona i habia na vorakato a ngatavine i parangi vona, i tahoka a koma, a ngatavine turane huriki e tuna ri gi made mule, a bakovi kunana ge vano. 5Pali a vorakato iea ge marikoi ni vano, a vuhuna i ngaru hateka e girihina, e huriki e tuna, 6lakea a matakari vona ge bole lakea na matana roho na Vure, ge bolea a maki i vere ge paditalea a talingana. Muri bara i leho liu vona ge harena na tahuna i mate.

7“Na tahuna a bakovi i habia e tuna a ngatavine ni gi kona ge ia a vorakato, na poloruana pida nahea ni gi longo vona ge vano manga e huriki a vorakato bakovi. 8Na tahuna a matakari ge parangi vona a ngatavine, muri i marikoi vona, e tamana ngatavine ge konamulea, a vuhuna a matakari vona i uka ma i rata a naro kamumu vona, nahea ge habia na robo basi ni gi kona. 9Na tahuna a matakari i ngarua e tuna bakovi ge parangi vona a ngatavine, ge rata kamumua, ge manga a hini i rata kamumua e tuna ngatavine. 10Na tahuna i parangi tabu a ngatavine tara, ge matakari kamumua ra ngatavine muga. Ge habi a maki ni kani, a varakia, ge mahita turana, manga a hini muga. 11Ia i uka ma i rata a maki i tolu nga, ge longo vona a ngatavine ge vano, pali nahea ge habi na ngatavine ranga moni.

A Vinara ni Pelekado a Vabinga

12 ^b“A bakovi i ubimatea tara bakovi, ra bakovi iea ni gi rabalaki. 13 ^cPali ia i uka ma i luhoi ge rabalakia a bakovi iea, i ngapa vona a hini i mate, ra bakovi i rabalaki a viri ge ha lakea na tanga a ngarua ge lakea vona. 14A bakovi i madihi a hatena i rabalakia a turana, muri i ha lakea na dede nau ge vakakori ia, mu bole tala ia mu rabalakia.

15“E rei a viri i toni ni rabalaki e tamana e kinana, ni gi rabalaki.

16 ^d“A bakovi i panahoa tara viri ge ia a vorakato vona o ge habia ni gi kona, na tahuna ni matavisi, ni gi rabalaki.

17 ^e“E rei a viri i harogi e tamana o e kinana, ni gi rabalaki.

18“A bakovi i ala rua ru vatahate, lakea a viri tara i padia na kedo o ubia a turana, i uka ma i mate, i mahita kunana na kiri, 19muri i bole a kodo i laho, ra bakovi i ubia i uka rarenga. Pali ge koli a moni vona ge vatovotovo turana a maka parava, i uka ma i leho vona, ge matakaria ge tavaga.

20“A bakovi i ubi a vorakato bakovi o a vorakato ngatavine na lebo i mate liu na parava iea, a bakovi i ubia ni gi vakamadihi. 21Pali bara vora iea i tavaga muri na parava i taku o i rua, naha ni vakamadihia a bakovi, a vuhuna ra vorakato iea, a vorakato vona kunana.

22“Na tahuna e huriki ri vaubi, lakea ni ubi a ngatavine i singou, muri i podea a koma i mate, e girihina ngatavine ge vakalongoa a mari ni pelekado a maregoa, ge takia a bakovi i ubi a ngatavine ge konea. 23Pali a ngatavine ge bole a vuranga dagi, mu kolia a naro i rata virihia vona. A ngatavine ge mate, a bakovi i rabalakia ni gi rabalaki. 24 ^fNa tahuna a matana viri, a ngina viri, a limana viri, a vahana viri ni ratapile, mu koli mu rata mavongea na bakovi i vakatubua a rongova. 25Na tahuna a bakovi i gutua a kuline girihina na kanono, i padia na vito i bele a ngarava, i lagua na lebo, ni gi koli ni gi rata mavonga a bakovi iea.

26“Na tahuna a bakovi i ubia a matana vorakato i ratapilea, ge takia a vorakato ge vano, ge kolia a matana ni ubi. 27Na tahuna i ubia a vorakato vona i masigo a ngina, a vorakato iea nahea ge leho tabu vona, a mapana ra ngina i masigo.

A Vinara na Bulmakau

28“Na tahuna a bulmakau i rabalaki a viri, a bulmakau ni gi padimate na kedo, nahea ni gi kani a bobona. Pali a tahona bulmakau nahea ni gi kau virihi na ngava. 29Na tahuna a bulmakau i valili i rabalaki bala a viri, ni gi taki a tahona ge ru dilia na nure. Pali ia ge marikoi, lakea a bulmakau i rabalakia tabu tara viri, a bulmakau turana a tahona ni gi rabalaki. 30Pali na tahuna ni gi taki ge konea a maregoa vona, ge konea, ge vakakori ia i uka ma ge mate. 31A bulmakau ge rabalaki a koma, mu ramai kunanea a vinara iea. 32A bulmakau ge rabalakia tara vorakato, a tahona bulmakau ge habia na tahona vorakato a moni silva i 30, muri a bulmakau ni gi padimate na kedo.

33“Na tahuna a bakovi i talea a hinebi na lovo o i kelia a lovo dagi i uka ma i tukaria a hinebi, lakea a bulmakau o a donki i boru puru vona i mate, 34a tahona lovo ge konea a tahona bulmakau, a donki ge bolea ge ne vona.

35“Na tahuna a bulmakau na bakovi tara i rabalakia a bulmakau na bakovi tara, ra bakovi nga ru gu habia a bulmakau i mahuri ni gi kona. Muri ru gu vaveru a moni, ru gu pokea a bulmakau i mate, ru gu vaveru tabu. 36Pali, bara bulmakau iea i vaubi i rabalaki bala a bulmakau ranga, a vuhuna a tahona i uka ma i ru dilia na nure, a tahona ge ngulia na tahona bulmakau i mate a bulmakau i mahuri, ge bolea a bulmakau i mate ge ne vona.